ਚੰਡੀਗੜ੍ਹ, 16 ਸਤੰਬਰ: ਪੰਜਾਬ ਦੇ ਉਦਯੋਗਿਕ ਨਕਸ਼ੇ ‘ਤੇ ਅੱਜ ਵੱਡੀ ਖੁਸ਼ਖਬਰੀ! ਕੈਬਨਿਟ ਮੰਤਰੀ ਸੰਜੀਵ ਅਰੋੜਾ ਨੇ ਐਲਾਨ ਕੀਤਾ ਕਿ ਹੈਪੀ ਫੋਰਜਿੰਗਜ਼ ਲਿਮਟਿਡ (ਐਚਐਫਐਲ) ਜ਼ਿਲ੍ਹਾ ਲੁਧਿਆਣਾ ਵਿੱਚ 1000 ਕਰੋੜ ਰੁਪਏ ਦਾ ਨਿਵੇਸ਼ ਕਰਨ ਜਾ ਰਹੀ ਹੈ। ਇਹ ਨਿਵੇਸ਼ ਸੂਬੇ ਵਿੱਚ 300 ਤੋਂ ਵੱਧ ਇੰਜੀਨੀਅਰਾਂ ਲਈ ਅਸਾਮੀਆਂ ਸਮੇਤ 2000 ਤੋਂ ਵੱਧ ਨਵੀਆਂ ਨੌਕਰੀਆਂ ਪੈਦਾ ਕਰੇਗਾ।
ਪੰਜਾਬ ਦਾ ਮਾਣ – ਐਚਐਫਐਲ:
ਐਚਐਫਐਲ ਦੇਸ਼ ਦੀ ਤੀਜੀ ਸਭ ਤੋਂ ਵੱਡੀ ਫੋਰਜਿੰਗ ਕੰਪਨੀ ਹੈ ਜੋ ਆਟੋ, ਖੇਤੀਬਾੜੀ ਉਪਕਰਣ, ਰੇਲਵੇ, ਵਿੰਡ ਟਰਬਾਈਨ, ਤੇਲ-ਗੈਸ ਅਤੇ ਰੱਖਿਆ ਖੇਤਰਾਂ ਲਈ ਉੱਚ ਗੁਣਵੱਤਾ ਵਾਲੇ ਪੁਰਜ਼ੇ ਬਣਾਉਂਦੀ ਹੈ।
ਏਸ਼ੀਆ ਦੀ ਸਭ ਤੋਂ ਵੱਡੀ ਯੂਨਿਟ ਪੰਜਾਬ ਵਿੱਚ:
ਐਚਐਫਐਲ ਦੇ ਮੈਨੇਜਿੰਗ ਡਾਇਰੈਕਟਰ ਅਸ਼ੀਸ਼ ਗਰਗ ਨੇ ਦੱਸਿਆ ਕਿ ਇਹ ਨਵਾਂ ਨਿਵੇਸ਼ ਏਸ਼ੀਆ ਦੀ ਸਭ ਤੋਂ ਉੱਨਤ ਫੋਰਜਿੰਗ ਯੂਨਿਟ ਬਣੇਗਾ, ਜੋ 1000–3000 ਕਿਲੋ ਤੱਕ ਭਾਰ ਵਾਲੇ ਉਤਪਾਦ ਤਿਆਰ ਕਰਨ ਵਿੱਚ ਸਮਰੱਥ ਹੋਵੇਗੀ। “ਇਹ ਪ੍ਰਾਜੈਕਟ ਸਿਰਫ਼ ਪੰਜਾਬ ਲਈ ਨਹੀਂ, ਸਾਰੇ ਦੇਸ਼ ਲਈ ਮਾਣ ਦਾ ਕਾਰਨ ਹੋਵੇਗਾ,” ਉਨ੍ਹਾਂ ਕਿਹਾ।
ਰੋਜ਼ਗਾਰ, ਉਦਯੋਗ ਤੇ ਅਰਥਵਿਵਸਥਾ ਨੂੰ ਵੱਡਾ ਬੂਸਟ:
ਕੈਬਨਿਟ ਮੰਤਰੀ ਸੰਜੀਵ ਅਰੋੜਾ ਨੇ ਕਿਹਾ, “ਇਹ ਨਿਵੇਸ਼ ਪੰਜਾਬ ਦੇ ਨੌਜਵਾਨਾਂ ਲਈ ਸੁਨਹਿਰੇ ਮੌਕੇ ਲਿਆਵੇਗਾ।
ਸੂਬੇ ਦੀ ਸਪਲਾਈ ਚੇਨ ਮਜ਼ਬੂਤ ਹੋਵੇਗੀ, ਸਹਾਇਕ ਉਦਯੋਗਾਂ ਨੂੰ ਹੁਲਾਰਾ ਮਿਲੇਗਾ ਅਤੇ ਸਟੀਲ ਦੀ ਖਪਤ ਵੀ ਵੱਧੇਗੀ।”
ਪੰਜਾਬ ਸਰਕਾਰ ਦੀਆਂ ਨੀਤੀਆਂ ‘ਤੇ ਭਰੋਸਾ:
ਐਚਐਫਐਲ ਨੇ ਕਿਹਾ ਕਿ ਹਾਲਾਂਕਿ ਹੋਰ ਰਾਜਾਂ ਤੋਂ ਵੀ ਆਫਰ ਸਨ, ਪਰ ਕੰਪਨੀ ਨੇ ਪੰਜਾਬ ਦੀ ਨਵੀਂ ਉਦਯੋਗਿਕ ਨੀਤੀ ‘ਤੇ ਪੂਰਾ ਭਰੋਸਾ ਜਤਾਉਂਦੇ ਹੋਏ ਇੱਥੇ ਹੀ ਵੱਡਾ ਨਿਵੇਸ਼ ਕਰਨ ਦਾ ਫ਼ੈਸਲਾ ਕੀਤਾ।
ਮੀਟਿੰਗ ਵਿੱਚ ਮੌਜੂਦ ਮਹੱਤਵਪੂਰਨ ਹਸਤੀਆਂ:
ਅਮਿਤ ਢਾਕਾ (ਸੀਈਓ, ਇਨਵੈਸਟ ਪੰਜਾਬ), ਸੀਮਾ ਬਾਂਸਲ (ਵਾਈਸ ਚੇਅਰਪਰਸਨ ਪੰਜਾਬ ਵਿਕਾਸ ਪ੍ਰੀਸ਼ਦ), ਵੈਭਵ ਮਹੇਸ਼ਵਰੀ ਅਤੇ ਮੇਘਾ ਗਰਗ (ਡਾਇਰੈਕਟਰ, ਐਚਐਫਐਲ)।
